मी आणि समीर भुजबळ यांनी मुख्यमंत्री देवेंद्र फडणवीस यांची भेट घेतली. सामाजिक व राजकीय आदी अनेक मुद्यांवर त्यांच्याशी चर्चा केली. ओबीसींच्या पाठबळामुळेच महायुतीचा महाविजय झाल्याचंही त्यांनी यावेळी मान्य केलं असल्याचं छगन भुजबळांनी म्हंटलं आहे. सोमवारी त्यांनी सागर बंगल्यावर मुख्यमंत्री देवेंद्र फडणवीस यांची भेट घेतली. भेट झाल्यानंतर छगन भुजबळांनी पत्रकारांशी संवाद साधला. ओबीसींचे नुकसान होऊ देणार नसल्याची ग्वाही यावेळी मुख्यमंत्र्यांनी दिली असल्याचंही भुजबळ यांनी सांगितलं आहे.

राष्ट्रवादी काँग्रेसचे ज्येष्ठ नेते तथा माजी मंत्री छगन भुजबळ हे मंत्रिमंडळात स्थान न मिळाल्याने नाराज आहेत. त्यामुळे ते मोठा निर्णय घेण्याची शक्यता आहे. याबद्दल त्यांनी अनेकवेळा सूचक वक्तव्य देखील केले आहेत. त्यानंतर आज त्यांनी अचानक सागर बंगल्यावर जात मुख्यमंत्री फडणवीस यांची भेट घेतली. दोघांत जवळपास अर्धा तास चर्चा झाली. या भेटीनंतर त्यांनी प्रसार माध्यमांना देखील प्रतिक्रिया दिली. यावेळी पुढील मार्ग काढण्यासाठी मुख्यमंत्र्यांनी 8-10 दिवसांचा वेळ मागितला असून आम्ही पुन्हा भेटून ओबीसींच्या मुद्यावर साधक - बाधक विचार करणार असल्याचं मुख्यमंत्री म्हणाले असं भुजबळ यांनी सांगितलं.