मुंबई : मराठा आरक्षणाच्या मागणीसाठी आज मोठ्या संख्येने मराठा बांधव मुंबईमध्ये रस्त्यावर उतरले आहेत. त्यामुळे चेंबूर परिसरात तब्बल तीन तासांपासून भीषण वाहतूक कोंडी निर्माण झाली आहे. या कोंडीत मराठा बांधवांसह सर्वसामान्य प्रवासी अक्षरशः अडकून पडले आहेत.

मिळालेल्या माहितीनुसार, पाच हजारांहून अधिक गाड्या चेंबूर परिसरात थांबून पडल्या असून वाहनधारकांना मोठा त्रास सहन करावा लागत आहे. सकाळपासूनच सुरू असलेल्या या वाहतूक कोंडीचा फटका कार्यालयीन वेळेतील प्रवाशांना मोठ्या प्रमाणात बसला आहे.

दरम्यान, पोलिसांकडून वाहतूक सुरळीत करण्याचे प्रयत्न सुरू असले तरी वाहनांची संख्या प्रचंड असल्याने कोंडी कमी होताना दिसत नाही. मराठा बांधवांच्या घोषणाबाजीमुळे परिसरात वातावरण तापले असून नागरिकांना पर्यायी मार्गांचा वापर करण्याचे आवाहन वाहतूक विभागाने केले आहे.