मध्य रेल्वेची वाहतूक पुन्हा एकदा विस्कळीत झाली असून, वांगणी आणि शेलू रेल्वे स्थानकांदरम्यान एका मालगाडीच्या इंजिनात बिघाड झाला होता. यामुळे कर्जतवरून मुंबईच्या दिशेने येणारी लोकल वाहतूक ठप्प झाली आहे. वृत्तानूसार, कर्जतवरून मुंबईच्या दिशेनं निघालेल्या लोकलची वाहतूक या ठिकाणी ठप्प झाल्यामुळे चाकरमान्यांना पुन्हा एकदा लेट मार्कचा फटका सहन करावा लागला आहे. या घटनेमुळे सकाळच्या वेळी कामावर निघालेले प्रवासी लोकलमध्येच अडकून राहिले होते. रेल्वे प्रशासनाकडून तातडीने दुरुस्तीचे काम हाती घेण्यात आले. बिघाड झालेली मालगाडी हटवण्यासाठी दुसरे इंजिन पाठवण्यात येत असून, ते आल्यानंतर मालगाडीला बाजूला करून वाहतूक पूर्ववत केली जाईल. तोपर्यंत प्रवाशांना त्रासाला सामोरे जावे लागले.