राष्ट्रवादी काँग्रेस शरदचंद्र पवार पक्षाचे ज्येष्ठ नेते शरद पवार यांना पुन्हा एकदा मुंबईतील ब्रीच कँडी रुग्णालयात दाखल करण्यात आले आहे. बुधवारी त्यांना रुग्णालयात नेण्यात आले असून, त्यांच्या काही वैद्यकीय चाचण्या करण्यात येणार आहेत. याबाबत खासदार सुप्रिया सुळे यांनी सोशल मीडियावर पोस्ट करून माहिती दिली.

शरद पवार रुग्णालयात दाखल झाल्याची बातमी समोर आल्यानंतर राजकीय वर्तुळातून त्यांच्या प्रकृतीची विचारपूस केली जात आहे. राष्ट्रवादी काँग्रेसच्या अजित पवार गटाचे नेते प्रफुल्ल पटेल यांनी ब्रीच कँडी रुग्णालयात जाऊन शरद पवार यांची भेट घेतली. यावेळी त्यांनी पवार यांच्या प्रकृतीची विचारपूस केली. दरम्यान, लोकसभेतील विरोधी पक्षनेते राहुल गांधी यांनीही शरद पवार यांना फोन केला. काँग्रेस नेत्या प्रियांका गांधी यांनीदेखील फोन करून त्यांच्या तब्येतीची माहिती घेतली. या दोन्ही नेत्यांनी शरद पवार यांच्या प्रकृतीबाबत विचारपूस केली. सध्या ब्रीच कँडी रुग्णालयात शरद पवार यांच्यावर उपचार सुरू असून, त्यांच्या वैद्यकीय चाचण्यांबाबत आणि प्रकृतीबाबत पुढील माहितीची प्रतीक्षा आहे.