देशात पुन्हा एकदा मेंदू खाणाऱ्या अमिबामुळे होणाऱ्या आजाराचा उद्रेक झाल्याने चिंता वाढली आहे. केरळमध्ये या आजारामुळे तब्बल १९ जणांचा मृत्यू झाला असून ६५ हून अधिक रुग्णांची नोंद झाली आहे.सरासरी चार ते पाच दिवसांनी ताप, जुलाब, डोकेदुखी आणि अंगदुखी ही लक्षणे दिसतात असे वैद्यकीय तज्ञांनी सांगितले आहे. आरोग्य विभागानं नागरिकांना विशेष काळजी घेण्याचं आवाहन केलं आहे.

हा अमिबा सामान्यतः पाण्यातून शरीरात प्रवेश करतो. विशेषतः पोहण्यासाठी गेलेल्या व्यक्तींच्या नाकावाटे तो शरीरात शिरतो आणि मेंदूपर्यंत पोहोचतो. यामुळे रुग्णांची प्रकृती झपाट्याने बिघडते आणि मृत्यूचा धोका वाढतो.डॉक्टरांनी नागरिकांना असुरक्षित व अस्वच्छ पाण्यात पोहणे टाळावे, शंका आल्यास त्वरित वैद्यकीय सल्ला घ्यावा, असे आवाहन केले आहे.