पालघर जिल्हयातील नालासोपाऱ्यातील श्रीपस्थान परिसरात आज सकाळी मोठी खळबळ उडाली. येथील राहुल इंटरनॅशनल स्कूल आणि मदर मेरी ज्युनिअर कॉलेज या दोन शाळांना अज्ञात व्यक्तीकडून बॉम्बने उडवून देण्याची धमकी ईमेलद्वारे देण्यात आली आहे. सकाळी ४ वाजून २६ मिनिटांनी शाळेच्या अधिकृत ईमेलवर ही धमकी आली. माहिती मिळताच पोलीस प्रशासन, तसेच अग्निशमन दल तातडीने घटनास्थळी दाखल झाले असून परिसरात सुरक्षा वाढवण्यात आली आहे.

सुरक्षेच्या दृष्टीने शाळा प्रशासनाने सर्व विद्यार्थ्यांना घरी पाठवले असून, शाळा इमारती रिकाम्या करण्यात आल्या आहेत. सध्या बॉम्ब शोध पथक शाळेच्या परिसराची कसून तपासणी करत आहे.

पोलिसांकडून याबाबत अधिक तपशील घेण्याचे प्रयत्न सुरू असून, हा मेल कुठून आला, याचा तपास सायबर विभाग करत आहे.

या घटनेमुळे परिसरात भीतीचे वातावरण असून, पालक आणि नागरिकांमध्ये चिंता वाढली आहे.