तब्बल 5 टर्म आमदार म्हणून निवडून आलेले सोलापूर उत्तरचे भाजप नवनिर्वाचित आमदार आणि माजी मंत्री विजयकुमार देशमुख सकाळपासून कार्यकर्त्यांच्या गराड्यात दिसून आले आहेत. सोलापूरच 5 वर्ष पालकमंत्री पद भूषविणाऱ्या विजयकुमार देशमुख यांच्या गंगा निवास या घरी त्यांना शुभेच्छा देण्यासाठी कार्यकर्त्यांची गर्दी झाली आहे. यावेळी सलग पाचव्यांदा आमदार म्हणून निवडून दिल्याबद्दल विजयकुमार देशमुख यांनी मतदारांचे आभार मानले आहेत.

दरम्यान, सोलापूर जिल्ह्यातील सर्वात सिनियर आमदार म्हणून भाजपकडून विजयकुमार देशमुख हे मंत्री पदाचे प्रबळ दावेदार असल्याची चर्चा सध्या होत आहे. मात्र याबद्दल बोलताना मंत्री पदासाठी अद्याप पक्षश्रेष्ठींकडून कुठलाही निरोप आला नसल्याचं देशमुख यांनी म्हंटलं आहे. तसंच आयुष्यभर भाजप कार्यकर्ता म्हणून काम करण्याची इच्छा यावेळी त्यांनी व्यक्त केली. तर महायुती सरकारमध्ये देवेंद्र फडणवीस हे मुख्यमंत्री व्हावेत अशी इच्छा भाजप आमदार विजयकुमार देशमुख यांनी बोलून दाखवली.

Edited By Rakhi Rajput