बुलढाण्यातील बंडखोरी थांबवण्यात महायुतीला अखेर यश आलं आहे. भाजपाचे विजयराज शिंदे यांनी आपला उमेदवारी अर्ज मागे घेतल्याने आता बुलढाण्यात शिंदेसेनेचे उमेदवार संजय गायकवाड यांचा विधानसभेचा मार्ग मोकळा झाला आहे.

विधानसभेसाठी महायुतीकडून बुलढाण्याची जागा शिंदे गटाला सुटल्यानंतर भाजपाचे इच्छुक उमेदवार विजयराज शिंदे यांनी बंडखोरी कडून अपक्ष उमेदवारी अर्ज दाखल केला होता. विजयराज शिंदे यांनी भाजपाकडे मैत्रीपूर्ण लढतीची परवानगी देखील मागितली होती. मात्र ही परवानगी नाकारत शिंदे गटाचे उमेदवार संजय गायकवाड हेच महायुतीचे अधिकृत उमेदवार असतील असं त्यांना सांगण्यात आलं. त्यामुळे विजयराज शिंदे नाराज होते. मात्र आता बंडखोरीचा वाद मिटविण्यात अखेर महायुतीच्या नेत्यांना यश आलं आहे. आज अर्ज माघारी घेण्याच्या शेवटच्या दिवशी विजयराज शिंदे यांनी आपला उमेदवारी अर्ज मागे घेतला आहे. त्यामुळे शिंदे गटाला बुलढाण्याचा मार्ग सुकर होणार आहे. काल भाजपा प्रदेशाध्यक्ष चंद्रशेखर बावनकुळे यांच्याशी झालेल्या चर्चेनंतर विजयराज शिंदे यांनी ही माघार घेतली आहे.

Edited By Rakhi Rajput