नाशिकमध्ये भाजप कार्यालयाबाहेर तणावपूर्ण वातावरण निर्माण झाले आहे. निष्ठावान कार्यकर्त्यांनी पक्षप्रवेशाला विरोध करत नव्याने प्रवेश घेणाऱ्यांना रोखून धरल्याने गोंधळाची स्थिती निर्माण झाली आहे. गेल्या एक तासापासून माजी महापौर विनायक पांडे, मनसे नेते यतीन वाघ, काँग्रेस नेते शाहू खैरे आणि माजी आमदार नितीन भोसले हे भाजप कार्यालयाबाहेर प्रतीक्षेत होते. मात्र, स्थानिक निष्ठावान कार्यकर्त्यांनी त्यांच्या पक्षप्रवेशावर आक्षेप घेतल्याने परिस्थिती चिघळली आहे.

नवे आणि जुने कार्यकर्ते आमने-सामने येऊ नयेत यासाठी पोलिसांनी बंदोबस्त वाढवला असून, वरिष्ठ पोलीस अधिकारीही घटनास्थळी दाखल झाले आहेत. भाजप कार्यालयाबाहेर कडेकोट पोलीस बंदोबस्त तैनात करण्यात आला आहे. या पक्षप्रवेशाला नाशिक मध्यच्या भाजप आमदार देवयानी फरांदे यांनी कडाडून विरोध केला आहे. यानंतर फरांदे आणि गिरीश महाजन यांच्यामध्ये शहरातील रेडीसन ब्ल्यु या हॉटेलमध्ये बैठक पार पडली. यानंतर महाजन यांच्या उपस्थित या सगळ्यांना भाजपमध्ये प्रवेश देण्यात आला.