नाशिकमध्ये भाजप आमदार सीमा हिरे आणि देवयानी फरांदे यांच्या घरातील व्यक्तिंनीच उमेदवारी अर्ज दाखल केले आहेत. सीमा हिरे यांची मुलगी रश्मी हिरे आणि दीर योगेश हिरे, तसेच देवयानी फरांदे यांचा मुलगा अजिंक्य फरांदे यांनी निवडणुकीच्या रिंगणात उडी घेतली आहे. आम्ही भारतीय जनता पार्टीच्या प्रभागात एकत्र फॉर्म भरलेले आहे, असे सांगत उमेदवारांनी विजयाचा विश्वास व्यक्त केला. महायुतीच्या अधिकृत घोषणेची वाट न पाहता हे अर्ज भरण्यात आले असून, यावेळी जोरदार शक्तिप्रदर्शन करण्यात आले. या घडामोडींमुळे नाशिकच्या राजकारणात घराणेशाहीची चर्चा रंगली आहे.

मागच्या दोन दिवसांपूर्वीच नाशिक येथील भाजप कार्यालयामध्ये बाहेरून आलेल्यांना पक्षात प्रवेश दिल्याने मोठा राडा झाला होता. कार्यकर्त्यांनी मंत्री गिरीश महाजन यांना घेराव घातला होता यामुळे भाजपच्या संकटमोचकांना मोठ्या रोषाला सामोरे जावे लागले होते. यावेळी आमदार देवयानी फरांदे यांना कार्यकर्त्यांसाठी अश्रु अनावर झाले होते. मात्र आज कार्यकर्त्यांना उमेदवारी न मिळता घरातील सदस्यांना मिळाल्याने आता कार्यकर्त्यांनी फक्त सतरंज्या उचलायच्या का? असा सवाल उपस्थित होत आहे.