नगर परिषदा आणि नगरपंचायतींचे निकाल जाहीर होत असून, आतापर्यंत हाती आलेल्या माहितीनुसार, २८८ पैकी बहुतांश पालिकांमध्ये भाजप किंवा भाजप प्रणित महायुतीची सत्ता येण्याची शक्यता वाढली आहे. अनेक ठिकाणी भाजपच्या निवडून आलेल्या उमेदवारांची संख्या अधिक आहे. तर थेट जनतेतून निवडून येणारे सर्वाधिक नगराध्यक्ष हे भाजपचे आहेत. आतापर्यंतच्या माहितीनुसार, भाजपचे सर्वाधिक १०८ नगराध्यक्षपदाचे उमेदवार विजयी झाले आहेत.

शिवसेनेने (शिंदे गट) देखील जबरदस्त मुसंडी मारली आहे. आतापर्यंत ४५ नगराध्यक्षपदाचे उमेदवार विजयी झाले आहेत. तर त्यानंतर अजित पवार यांच्या राष्ट्रवादीचे २० नगराध्यक्षपदाचे उमेदवार निवडून आले आहेत. राज्यातील सत्ताधारी महायुतीचा वरचष्मा दिसत असला तरी, विरोधी महाविकास आघाडीपैकी काँग्रेस पक्षानेही बाजी मारल्याचे दिसते. काँग्रेसचे नगराध्यक्षपदाचे ३६ उमेदवार आतापर्यंत विजयी झालेले आहेत.