ACB Raid Raises Trouble for Minister Narahari Zirwal : मंत्रालयातील लाच प्रकरणाने सध्या राजकीय आणि प्रशासकीय वर्तुळात मोठी खळबळ उडाली आहे. या प्रकरणातील मुख्य संशयित आरोपी राजेंद्र ढेरिंगे याच्या नाशिक रोड येथील निवासस्थानी लाचलुचपत प्रतिबंधक विभागाने (ACB) छापा टाकून घराची झडती घेतली आहे. यामध्ये एसीबीच्या हातात महत्त्वाची कागदपत्रे लागल्याची माहिती मिळाली आहे. या प्रकरणामुळे मंत्री नरहरी झिरवाळ यांच्या अडचणीत वाढ झाली आहे. त्यांच्या राजीनाम्याची मागणी विरोधकांकडून कऱण्यात येत आहे.

झडतीमध्ये महत्त्वाची कागदपत्रे जप्त

एसीबीसा ढेरिंगेच्या घरातून महत्त्वाची आणि संशयास्पद कागदपत्रे हाती लागल्याची माहिती समोर आली आहे. या कागदपत्रांमुळे आता या लाच प्रकरणाच्या चौकशीला मोठी गती मिळण्याची शक्यता वर्तवण्यात येत आहे. जप्त केलेली ही कागदपत्रे आज न्यायालयात सादर केली जाऊ शकतात. दरम्यान,  राजेंद्र ढेरिंगे हा मूळचा 'अन्न आणि नागरी पुरवठा' विभागातील कर्मचारी आहे. मात्र, गेल्या वर्षभरापासून तो 'अन्न आणि औषध प्रशासन' विभागामध्ये प्रतिनियुक्तीवर कार्यरत होता. सध्या त्याची नियुक्ती मंत्रालयातील अपील विभागात होती.