राज्यात उन्हाच्या तडाख्याने नागरिक हैराण असतानाच मान्सूनबाबत आनंदाची बातमी समोर आली आहे. बंगालच्या उपसागरातील कमी दाबाच्या क्षेत्रामुळे यंदा मान्सून अंदमानात निर्धारित वेळेच्या आधीच दाखल होण्याची शक्यता आहे. अंदमाननंतर मान्सून भारतात दाखल होतो. अंदमानात मान्सून वेळेआधी दाखल होणार असल्यामुळे तो भारतात वेळेवर दाखल होईल असा अंदाज वर्तवला जात आहे.

स्कायमेट या खासगी हवामान संस्थेकडून हा अंदाज वर्तवण्यात आला आहे. याआधी १४ ते २२ मे दरम्यान मान्सूनच्या आगमनाचा अंदाज वर्तवण्यात आला होता. मात्र स्कायमेटच्या अंदाजानुसार यंदा १४ मेपूर्वीच मान्सून अंदमानात धडकण्याची शक्यता वर्तवण्यात आली आहे. यामुळे महाराष्ट्रातही मान्सून वेळेआधीच पोहोचण्याची चिन्हे असून लवकरच नागरिकांची उकाड्यापासून सुटका होण्याची शक्यता आहे.