ऐन निवडणुकीत उपमुख्यमंत्री एकनाथ शिंदे यांना मोठा धक्का बसला आहे. ठाण्यात शिवसेनेत अंतर्गत वाद चिघळल्याचं चित्र दिसत आहे. शिवसेनेच्या माजी महापौर मीनाक्षी शिंदे यांनी आपल्या पदाचा राजीनामा दिला आहे. त्यांच्या प्रभागातील शाखाप्रमुख वायचळ यांची पक्षातून हकालपट्टी करण्यात आल्याने त्यांनी हा निर्णय घेतल्याची माहिती समोर आली आहे.

शाखाप्रमुख विक्रम वायचळ यांच्यावर करण्यात आलेल्या कारवाईबाबत पक्षाने कोणतीही पूर्वसूचना न देता निर्णय घेतल्याचा आरोप मीनाक्षी शिंदे यांनी केला आहे. पक्षातील निष्ठावान कार्यकर्त्यांवर अन्याय होत असल्याने राजीनामा देण्याशिवाय पर्याय नसल्याचं त्यांनी स्पष्ट केलं आहे.

मीनाक्षी शिंदे काय म्हणाल्या पत्रात?

मी. सौ. मीनाक्षी राजेंद्र शिंदे, याद्वारे माझ्याकडे असलेल्या 'ठाणे जिल्हा महिला आघाडी जिल्हा संघटक या पदाचा राजीनामा सादर करत आहे.

आजवर पक्षाने माइयावर जो विश्वास दाखवला आणि मला काम करण्याची संधी दिली, त्याबद्दल मी पक्षाची आणि सर्व वरिष्ठ नेत्यांची ऋणी आहे, वैयक्तिक कारणास्तव (किंवा सध्याच्या राजकीय परिस्थितीचा विचार करून), मी या पदावर काम करण्यास असमर्थ असून, मी माझ्या पदाचा त्याग करत आहे, कृपया माझा राजीनामा स्वीकारण्यात यावा, ही विनंती धन्यवाद.