गेल्या काही दिवसांपासून चर्चेत असलेल्या छत्रपती संभाजीनगरच्या वीट्स हॉटेलच्या लिलाव प्रक्रियेला पुन्हा एकदा झटका बसला आहे. या हॉटेलची लिलाव प्रक्रिया सातव्यांदा रद्द करण्यात आली आहे. यामागचं कारण म्हणजे शिवसेना शिंदे गटाचे मंत्री संजय शिरसाट यांचे सुपुत्र सिद्धांत शिरसाट यांनी निविदेसाठी आवश्यक असलेली अनामत रक्कम भरलेली नाही.

आज २० जून रोजी ही रक्कम भरण्याची अंतिम मुदत होती. मात्र मुदतीच्या आत पैसे न भरल्यामुळे लिलाव अर्ज रद्द करण्यात आला. लिलाव प्रक्रियेसाठी २५ टक्के रक्कम जमा करणं बंधनकारक होतं, मात्र तीही भरली गेली नाही.

दरम्यान, या लिलाव प्रक्रियेवर सातत्याने आरोप होत होते. या पार्श्वभूमीवर मंत्री संजय शिरसाट यांनी स्वतः या प्रक्रियेतून माघार घेत असल्याची घोषणा यापूर्वीच केली होती.

110 कोटींचे हे हॉटेल वीट्स 68 कोटी रुपयांमध्ये खरेदी करत असल्याचा आरोप संजय शिरसाट यांचे सुपुत्र सिद्धांत शिरसाट यांच्यावर केला होता. ठाकरे गटाचे खासदार संजय राऊत आणि अंबादास दानवे यांनी शिरसाट यांनी दबावातून हे हॉटेल कमी किमतीत घेण्यास भाग पाडले होते. तसेच त्यांच्याकडे एवढे पैसे आले कुठून? असाही प्रश्न विचारला होता. या आरोपानंतर संजय शिरसाट यांनी लिलाव प्रक्रियेतून माघार घेत असल्याची घोषणा केली होती.