उद्धव ठाकरे यांच्या शिवसेनेचे खासदार शिंदे गटात जाणार असल्याच्या वृत्तानं राजकारण ढवळून निघालं असतानाच, शिंदे गटाच्या आमदारानं केलेल्या दाव्यानं महाराष्ट्राच्या राजकारणात खळबळ उडाली आहे. ठाकरे गटाचे खासदार संजय राऊत हेच येत्या काही दिवसांत शिंदेंच्या शिवसेनेत प्रवेश करणार असल्याचा दावा आमदार संतोष बांगर यांनी केला आहे.

ठाकरे गटाचे दोन ते तीन खासदार आपल्या संपर्कात आहेत, असा दावा बांगर यांनी केला. मी त्यांना भेटलो आहे. तुमच्या मनासारखंच होईल, असं त्यांनीही मला सांगितलं आहे, असंही बांगर म्हणाले.

याशिवाय, उद्धव ठाकरे गटाचे खासदार संजय राऊत हे देखील येत्या काही दिवसांत एकनाथ शिंदे यांच्या शिवसेनेत प्रवेश करतील असे ते म्हणाले.

दुसरीकडे, ठाकरे गटाचे काही खासदार शिवसेनेत जाणार असून, नेत्यांच्या संपर्कात असल्याच्या वृत्तानं खळबळ उडाली होती. त्यावर सर्व खासदारांनी एकत्रित येऊन पत्रकार परिषद घेतली आणि यावर स्पष्टीकरण दिलं आहे. आम्ही सर्व खासदार हे उद्धव ठाकरे आणि त्यांच्या शिवसेनेसोबतच आहोत. ज्या कुणी हा दावा केला आहे, त्यांनी आधी स्वतःचा विचार करावा. महाराष्ट्रातील जनता सर्व बघत आहे. त्यांच्या पक्षातच वेगाने हालचाली सुरू आहेत. कुणाचं महत्व कमी केलं जात आहे, या गोष्टींचा त्यांनी सखोल विचार करावा. लोकसभेतील नऊ आणि राज्यसभेतील दोन खासदार असे ११ खासदार आम्ही उद्धव ठाकरे यांच्यासोबतच आहोत, असं या खासदारांनी स्पष्ट केलं आहे.