राज्याचे विधानसभा अर्थसंकल्पीय अधिवेशन सुरू आहे. यंदाचे अधिवेशन चांगलेच वादळी ठरले. आज ठाकरे गटाचे आमदार भास्कर जाधव यांनी सभागृहात एक खळबळजनक आरोप केला. काही सत्ताधारी आमदार हे विधानसभा अध्यक्षांच्या कर्मचारांच्या ऑफिसात गेले आणि लक्षवेधी लावण्यासाठी किती पैसे पाहिजेत असं सत्ताधारी आमदारांनी विचारलं. भास्कर जाधव म्हणाले, काल काही सत्ताधारी आमदार विधानसभा अध्यक्षांचे जे कर्मचारी आहेत. त्यांच्या ऑफिसमध्ये गेले आणि विचारले. लक्षवेधी लावण्यासाठी तुम्हाला किती पैसे पाहिजे ते सांगा आणि माझी लक्षवेधी लावा असा गंभीर आरोप भास्कर जाधव यांनी केला.

एका वर्तमान पत्रात ही बातमी आल्याचा पुरावा देत त्यांनी यावर चौकशीची मागणी केली आहे. दरम्यान या आरोपांवर उपमुख्यमंत्री अजित पवार म्हणाले, जनतेने एवढ्या मतांनी जनतेने आपल्याला निवडून दिले आहे. विधानसभा अध्यक्ष असताना असे आरोप करणे कितपत योग्य आहे? हे रेकॉर्डवरुन काढून टाकण्याची मागणी त्यांनी केली. तसेच भास्कर जाधव यांनी देवेंद्र फडणवीस यांना भेटून जे काही पुरावे आहे ते द्यावे जो कोणी असेल त्याच्यावर कडक कारवाई करू असे अजित पवार म्हणाले.