बेस्ट उपक्रमाच्या खाजगीकरण आणि मालमत्ता विक्रीच्या प्रस्तावाविरोधात बेस्ट वर्कर्स युनियनने उद्यापासून उपोषणाचा इशारा दिला आहे. महापालिकेच्या विशेष सभेत २२ आगारांच्या विकासाचा प्रस्ताव मांडला जाणार असून, यावर भाजप-शिवसेनेने व्हिप जारी केला आहे. बेस्ट उपक्रमाच्या मालमत्ता विक्रीला शशांक राव यांच्या बेस्ट वर्कर्स युनियनने विरोध केला आहे. तसेच बेस्ट कर्मचाऱ्यांना सातवा वेतन आयोग लागू करणे, वेतन करार तातडीने करणे आणि वेट लीज कर्मचाऱ्यांना समान कामासाठी समान वेतन देण्यासह विविध मागण्यांसाठी कर्मचारी आक्रमक झाले आहेत. युनियनचे सरचिटणीस शशांक राव यांच्या नेतृत्वात ऑपेरा हाऊस येथे हे आंदोलन होणार आहे. सातवा वेतन आयोग लागू करण्याच्या मागणीसह इतर प्रलंबित मागण्यांसाठी हे आंदोलन करण्यात येणार आहे. कर्मचाऱ्यांच्या आंदोलनाचा बेस्टच्या सेवेवर परिणाम होण्याची शक्यता आहे.