बीडचे माजी सरपंच संतोष देशमुख हत्या प्रकरणी आता पोलीसच चौकशीच्या फेऱ्यात आले आहेत. निवृत्त न्यायाधीश ताहलीयानी यांच्या अध्यक्षतेखाली एक सदस्यीय समिती पोलिसांची चौकशी करणार आहे. संतोष देशमुख हत्या प्रकरण पोलिसांनी कसं हाताळलं याची चौकशी करून येत्या तीन ते सहा महिन्यात ही समिती त्याचा आहाल सादर करणार आहे. तसंच अशा घटनांची पुनरावृत्ती टाळण्यासाठी आपत्कालीन आणि दीर्घकालीन उपाय सुचवणे या मुद्यांवर ही समिती चौकशी करणार असल्याचं समजत आहे.

मस्साजोगचे माजी सरपंच संतोष देशमुख हत्या प्रकरणात एक सदस्यीय समितीकडून पोलिसांची चौकशी केली जाणार आहे. संपूर्ण घटनाक्रम, त्याची कारणे आणि परिणाम याचा अभ्यास समिती करणार आहे. कोणती व्यक्ती प्रत्यक्ष किंवा अप्रत्यक्ष जबाबदार होती याचा तपास केला जाणार आहे. कायदा सुव्यवस्था राखण्यात पोलिसांचं नियोजन योग्य होतं का? परिस्थिति हाताळण्यासाठी पोलिसांनी उचललेली पावलं योग्य होती का? याची देखील चाचपणी या समितीकडून होणार आहे.