पहलगाममधील दहशतवादी हल्ल्यानंतर पाकिस्तानवर युद्ध आणि विनाशाची टांगती तलवार लटकताना दिसत आहे. दुसरीकडे पाकिस्तान आपल्या भूमीवर स्वतःच्या एजंट आणि सैनिकांचेही रक्षण करू शकलेला नाही. बलुच लिबरेशन आर्मीने (BLA) पुन्हा एकदा पाकिस्तानला हादरवून टाकले आहे. बलूचने पाकिस्तानच्या गुप्तचर संस्था ISI च्या एका एजंटचा खात्मा केला आहे. हा हल्ला पासनी भागात करण्यात आला आहे.

BLA च्या माहितीनुसार, इतर तीन कारवायांमध्ये बलुच आर्मीने पाकिस्तानच्या सैन्य, पोलिस दल व सैंदक प्रोजेक्टशी संबंधित वाहनांना लक्ष्य केले असून मुख्य राष्ट्रीय महामार्गावर नाकाबंदीही केली आहे.

बलुच लिबरेशन आर्मीने जाहीर केले आहे की, त्यांनी ठार केलेल्या ISI अधिकाऱ्याचे नाव मुहम्मद नवाज असून तो पंजाबमधील खुशाब जिल्ह्यातील चोरंगी जोहराबादजवळील हकीम वाला गावाचा रहिवासी होता. हा एजंट ग्वादरजवळील पासनी शहरात एका गुप्त मोहिमेदरम्यान मारला गेला. या हल्ल्यात ISI एजंट आपल्या पथकासोबत प्रवास करत होता. हल्ल्यात सलमान नावाच्या दुसऱ्या एजंटचा देखील मृत्यू झाला असून शाह नजर नावाचा एजंट जखमी झाला आहे. त्यांच्या वाहनाचा पूर्णपणे नायनाट करण्यात आला आहे.