Bajrang Sonwane Beed | बीड जिल्ह्यात बोगस मतदानावरून व्हिडिओसह आरोपांच्या फैरी झडत असतांना आता महाविकास आघाडीचे उमेदवार बजरंग सोनवणे यांनी निवडणूक आयोगाला पत्र लिहिलंय. बीड जिल्हा निवडणूक निर्णय अधिकाऱ्यांसह जिल्ह्यातील इतर अधिकाऱ्यांना मतमोजणी प्रक्रियेत भाग घेऊ देऊ नये, असा उल्लेख करत त्यांनी राज्याच्या निवडणूक विभागाला पत्र लिहिले आहे. या पत्रात बजरंग सोनवणे यांनी म्हटलंय, की मी बजरंग मनोहर सोनवणे 39 बीड लोकसभा या मतदार संघातून नॅशनॅलिस्ट कॉग्रेस पार्टी शरदचंद्र पवार यांचा उमेदवार म्हणून उभा आहे. निवडणूक निर्णय अधिकारी दिपा मुधोळ, मुंडे, व्यंकटेश मुंडे तहसिलदार परळी वैजनाथ, दहिफळे पोलिस निरिक्षक, पोलिस स्टेशन सिरसाळा, बांगर पोलिस निरिक्षक, पोलिस स्टेशन, बीड, या अधिकाऱ्यांनी निवडणूक प्रक्रियेमध्ये आपले कर्तव्य निष्ठेने, पारदर्शकतेने व निपक्षःपणे बजावले नसल्यामुळे आणि बहुतांशी अधिकारी बीड जिल्हयातीलच रहिवाशी असल्यामुळे मतमोजणी प्रक्रियेमध्ये बीड जिल्ह्यातच काम कसे करु शकतात ? ही बाब बेकायदेशीर असून त्यामुळे मतमोजणी प्रभावित होण्याची दाट शक्यता आहे.