मयुरेश कडव , साम टीव्ही

बदलापुरात मनसे कार्यकर्त्यांनी एका परप्रांतीयाला चांगलाच चोप दिलाय. मराठीचा अपमान केल्याप्रकरणी तसेच पालिका कर्मचाऱ्यांशी हाणामारी केल्याबद्दल संतप्त झालेल्या मनसे कार्यकर्त्यांनी या परप्रांतीयाचा चांगलाच समाचार घेतलाय.

बदलापूर पश्चिमेकडील ट्रेंड्स शॉप समोर सकाळच्या सुमारास काही फळ विक्रेत्यांवर नगरपालिकेचे कर्मचारी कारवाई करत होते. त्यावेळी एका परप्रांतीय विक्रेत्याने कर्मचाऱ्यांशी हुज्जत घातली तसंच त्यांच्यावर हल्लाही केला. या झटापटीत एक कर्मचारी जखमी झालाय. यावेळी या परप्रांतीय विक्रेत्याने मराठी भाषेचा अपमान केल्याचा आरोपही करण्यात येतोय.

त्यानंतर मनसे कार्यकर्त्यांनी घटनास्थळी धाव घेत या विक्रेत्याला माफी मागण्यास सांगितलं. मात्र त्याने माफी मागण्यास नकार दिला. त्यामुळे संतापलेल्या मनसे कर्मचाऱ्यांनी खळखट्याक स्टाईल या परप्रांतीय विक्रेत्याची धुलाई केली. त्याचाच व्हिडिओ सोशल मीडियात व्हायरल होतोय. बदलापुरात मोठ्या प्रमाणात परप्रांतीय फळ विक्रेते आहेत. त्यांची मुजोरी वाढत असल्याच्या तक्रारी वारंवार नागरिकांकडून येत होत्या. या परप्रांतीयांमध्ये बांगलादेशींचं प्रमाणही अधिक असल्याचं सांगण्यात येतय. त्यामुळे या फळ विक्रेत्यांची पार्श्वभूमी तपासून पाहावी अशी ही मागणी नागरिकांमधून होतीय. तर यापुढे मराठीचा अवमान केल्यास, त्यांना मनसे स्टाईल उत्तर दिलं जाईल असा इशारा मनसे कार्यकर्त्यांनी दिलाय.