आमदार बच्चू कडू यांनी मंत्री गुलाबराव पाटील यांच्या एका वक्तव्यावरून तीव्र संताप व्यक्त केला आहे. गुलाबरावांना पैशाची मस्ती आली असून निवडणूक आयोग झोपा काढत आहे का? असा सवाल कडू यांनी केला आहे. बच्चू कडू यांनी म्हटले आहे की, अशी बोलणाऱ्याची मस्ती जिरवणं गरजेचं आहे आणि गुलाबराव तुम्हाला असं वाटत असेल की पैशानं सगळे लोक विकत घेतले जात आहे तर हे चुकीचं आहे. पाटील यांनी निवडणुकीपूर्वी 'लक्ष्मी' येण्याबाबत आणि 'नगरविकास खात्या'बद्दल केलेल्या वक्तव्यावर कडू यांनी जोरदार टीका केली. एका मंत्र्याने असे वक्तव्य करणे चुकीचे असून त्यांच्यावर गुन्हा दाखल झाला पाहिजे, अशी मागणीही बच्चू कडू यांनी केली. तुम्ही धर्माचं पांघरून घेतलं म्हणून वाचून आहात, नाहीतर कुत्र्यांनी ही विचारलं नसतं अशा शब्दात कडू यांनी पाटलांवर हल्लाबोल केला.