Sunil Chauthamal resignation from Thackeray Sena and entry into BJP : विधानसभा निवडणुकीनंतर भाजपमध्ये मोठ्या प्रमाणात इनकमिंग सुरू आहे. राज्यात सध्या स्थानिक स्वाराज्य संस्थांच्या निवडणुका होता आहेत. त्याआधीच भाजपकडून पुन्हा एकदा उद्धव ठाकरेंना धक्का देण्यात आला आहे. अमरावतीमधील माजी उपनगराध्यक्ष सुनील चौथमल यांनी ठाकरेंच्या शिवसेनेला जय महाराष्ट्र केला असून भाजपमध्ये दाखल झाले आहेत.

अमरावतीमध्ये भाजपने ठाकरे सेनेला मोठा धक्का दिला आहे. ठाकरे गटाचे नेते आणि धारणी नगरपंचायतचे माजी उपनगराध्यक्ष सुनील चौथमल यांनी भारतीय जनता पक्षात प्रवेश केला आहे. विशेष म्हणजे, पक्षात प्रवेश करताच भाजपने त्यांना धारणी नगराध्यक्षपदाची उमेदवारी जाहीर केली आहे. निवडणुकीच्या तोंडावर ठाकरे सेनेतील एका महत्त्वाच्या नेत्याला पक्षात घेऊन थेट उमेदवारी देण्याच्या भाजपच्या या वेगवान खेळीमुळे राजकीय वर्तुळात मोठी चर्चा सुरू झाली आहे. या अनपेक्षित राजकीय घडामोडीमुळे अमरावती जिल्ह्यातील, विशेषतः धारणीतील राजकीय समीकरणे बदलण्याची शक्यता वर्तवली जात आहे.