शरद पवारांच्या राष्ट्रवादीचे खासदार अमोल कोल्हे पक्षांतर करणार नाहीत, असा विश्वास ठाकरेसेनेचे खासदार संजय राऊत यांनी व्यक्त केला आहे. त्यानंतर अमोल कोल्हेंनी स्वतः स्पष्टीकरण दिलं आहे. मी कुठेही जाणार नाही. राष्ट्रवादीतच राहणार आहे. शरद पवार सांगतील ते धोरण आणि बांधतील ते तोरण असेल, असा ठाम निर्धारही त्यांनी यावेळी व्यक्त केला.

गेल्याच महिन्यात उद्धव ठाकरेंच्या शिवसेनेच्या सहा खासदारांनी बंडखोरी करत, शिंदेंच्या शिवसेनेत प्रवेश केला. सुरुवातीला त्यांनी एक गट केला होता. त्यानंतर काही तासांतच त्यांनी शिंदेंच्या शिवसेनेत प्रवेश केला. त्यामुळे ठाकरेंना हा मोठा धक्का होता. ठाकरेंचे आणखी काही आमदार फुटतील अशी चर्चा राजकीय वर्तुळात सुरू झाली होती. यानंतर अमोल कोल्हेंच्या पक्षांतराच्या चर्चा जोर धरू लागल्या होत्या. त्यावर ठाकरेंचे खासदार संजय राऊत यांनी कोल्हे पक्षांतर करणार नाहीत, असा विश्वास व्यक्त केला. तसेच स्वतः अमोल कोल्हेंनीही स्पष्टीकरण देत या चर्चांना पूर्णविराम दिला.