बीड: जादूची कांडी नाही माझ्याकडे तुम्ही सहकार्य करा. मी सहकार्य करतो. नाहीतर मी जातो. घ्या पालकमंत्री कोणाला घ्यायचे ते असे म्हणत वेगवेगळे प्रश्न मांडणाऱ्या बीडकरांना अजित पवार यांनी संयमाचा सल्ला दिला. अजित पवार हे रात्री बीडमध्ये मुक्कामी होते. यानंतर पहाटे पावणेसहा वाजण्याच्या आधीच चंपावती क्रीडा मंडळाचा आढावा घेतला. त्यानंतर कंकालेश्वर मंदिराच्या विकासाच्या आराखड्याचा आढावा घेऊन ते थेट जिल्हा क्रीडा संकुलावर पोहोचले. या परिसरात असलेला कचरा पाहून दादांनी सर्वात आधी हा कचरा तिथून हटवत तेथे पार्किंग करण्याच्या सूचना केल्या. यानंतर या ठिकाणी उपस्थित असलेले काही खेळाडू व ज्येष्ठ नागरिकांनी विविध सूचना, समस्या मांडल्या.

यावेळी अजित पवार यांनी याआधी तुम्ही लोकप्रतिनिधी निवडून दिले त्यांनी काहीच केलं नाही. आता मला कोणाचे काही काढायचे नाही. परंतु मी करायला लागलो तर मलाच ढुसण्या मारायला लागले माझ्याकडे काही जादूची कांडी नाही. तुम्ही सहकार्य करा मी सहकार्य करतो नाहीतर मी जातो. मग करा कोणाला पालकमंत्री करायचे तर असे म्हणत विकासाच्या प्रश्नावर उतावळी झालेल्या बीडकरांबाबत नाराजी देखील व्यक्त केली. अजित पवार यांनी सहा वाजल्यापासूनच दौऱ्याला सुरुवात केल्याने प्रशासकीय अधिकारी कार्यकर्त्यांची चांगलीच धावपळ उडालेली होती.