राज्याचे उपमुख्यमंत्री अजित पवार यांनी अखेर कृषिमंत्री माणिकराव कोकाटे यांच्या वादग्रस्त रम्मी व्हिडिओवर मौन सोडत प्रतिक्रिया दिलीय. मला मिळालेल्या माहितीनुसार, हा प्रकार सभागृहाच्या आत घडलेला आहे. या प्रकरणाची चौकशी करण्याची जबाबदारी राम शिंदे आणि विधानसभा अध्यक्ष राहुल नार्वेकर यांच्याकडे आहे. त्यांनी या प्रकरणी चौकशी लावली आहे, अशी माझी माहिती आहे, असं अजित पवार यांनी स्पष्ट केलं.

अजित पवार पुढे म्हणाले, सध्या मी कार्यक्रमांमध्ये व्यस्त असल्यामुळे यावर फारसं बोलणं झालेलं नाही. कोकाटेंनी याबाबत पत्रकार परिषद घेऊन आपलं स्पष्टीकरण दिलं आहे, मात्र अजून आमची भेट झालेली नाही. सोमवारी मी स्वतः कोकाटेंची भेट घेणार आहे.

राज्यात देवेंद्रजींच्या नेतृत्वात सरकार स्थापन झाल्यानंतर आम्ही सर्व मंत्र्यांना जबाबदारीची जाणीव ठेवून काम करण्याच्या सूचना दिल्याचंही त्यांनी स्पष्ट केलं. कोकाटे पहिल्यांदा बोलले तेव्हा त्यांना समज दिली होती. पण आता एकदा झालं, दोनदा झालं. त्यामुळे आता त्यांच्याशी प्रत्यक्ष चर्चा करून योग्य निर्णय घेतला जाईल, असं उपमुख्यमंत्री अजित पवार यांनी सांगितलं.