Ajit Pawar not reachable after Pune civic election talks : पुणे महापालिका निवडणुकीसाठी शरद पवाराची राष्ट्रवादी आणि अजित पवार यांच्या राष्ट्रवादी काँग्रेसमध्ये जागावाटपची चर्चा फिस्कटली. त्यानंतर राष्ट्रवादी काँग्रेसमधील राजकारणात घडामोडींना वेग आलाय. अजित पवार पुण्यातील बारमती हॉस्टेलमध्ये मुक्कामी होते. पण ते अचानक कुणालाही न सांगता, पोलिसाचा ताफा न घेता निघून गेले. त्यामुळे पुण्याच्या राजकारणात चर्चेला उधाण आलेय. अजित पवार नेमके गेले कुठे असा सवाल बारामती अन् पुण्यात विचारला जातोय.

उपमुख्यमंत्री अजित बारामती हॉस्टेलमधून ज्या वाहनाने रवाना झाले ते वाहन पुण्यातील जिजाई या निवासस्थानी आढळले. पण उपमुख्यमंत्री अजित पवार जिजाई निवासस्थानी आहेत की नाहीत, याबाबत माहिती देण्यास कर्मचार्‍यांनी नकार दिला. गेल्या काही दिवसांपासून अजित पवार बारामती हॉस्टेलमध्ये बैठका घेत होते. महापालिका निवडणूक जागावाटप अन् तिकिटवाटपावर चर्चा सुरू होत्या. पण आज सकाळी कुणालाही काहीही न सांगता अजित पवार तिथून निघून गेले. नेहमी सोबत असणारा पोलिसांचा फौजफाटा, पायलट कार आणि सुरक्षारक्षक यांचा ताफा हॉस्टेलच्या बाहेरच उभा राहिला. तिथून अजित पवार एकटेच निघून गेले. त्यामुळे चर्चेला उधाण आले.