राज्याचे उपमु्ख्यमंत्री अजित पवार यांच्या पार्थिवावर बारामतीमध्ये अंत्यसंस्कार होत आहे. विद्या प्रतिष्ठानच्या प्रांगणात अजित पवार यांच्यावर अंत्यसंस्कार होणार असून त्यांचे सुपुत्र पार्थ पवार आणि जय पवार यांनी शेवटचे धार्मिक विधी केले. यावेळी संपूर्ण पवार कुटुंबीय उपस्थित होते. धार्मिक विधी पूर्ण झाल्यानंतर पवार कुटुंबातील सर्व सदस्यांनी अजित पवार यांच्या पार्थिवाचे अंतिम दर्शन घेतलं. यावेळी सुप्रिया सुळे वहिनी सुनेत्रा पवार यांना हाताला धरून अजित पवारांच्या पार्थिवाचे शेवटचे दर्शन घेण्यासाठी घेऊन आल्या. सुप्रिया सुळे यांनी सुनेत्रा पवार यांना सावरलं. यावेळी सुनेत्रा पवार आणि सुप्रिया सुळे यांना अश्रू अनावर झाले. लाडका दादा सोडून गेल्यामुळे सुप्रिया सुळे मनातून खचल्या असल्या तरी देखील त्या संपूर्ण कुटुंबाला आधार देताना दिसल्या. यावेळी जड अंत:करणाने पवार कुटुंबीय अजित पवार यांना अंतिम निरोप देताना दिसले.