अहिल्यानगर नगर शहरातून जाणाऱ्या नगर-छत्रपती संभाजीनगर महामार्गावर गाई कापल्याची घटना उघडकीस आल्यानंतर परिसरात तणावाचे वातावरण निर्माण झाले आहे. या घटनेच्या निषेधार्थ आमदार संग्राम जगताप यांच्या नेतृत्वाखाली हिंदुत्ववादी संघटनांनी महामार्गावर ठिय्या देत रस्ता रोको आंदोलन सुरू केले आहे. घटनेनंतर परिसरात मोठा पोलिस बंदोबस्त तैनात करण्यात आला असून वातावरण तणावपूर्ण आहे. आंदोलनकर्त्यांनी आरोपींना तात्काळ अटक करण्याची मागणी केली आहे. जोपर्यंत आरोपींवर कठोर कारवाई होत नाही, तोपर्यंत आंदोलन सुरू ठेवण्याचा इशारा आमदार जगताप आणि हिंदुत्ववादी संघटनांनी दिला आहे. या आंदोलनामुळे महामार्गावरील वाहतूक विस्कळीत झाली असून वाहनांच्या मोठ्या रांगा लागल्या आहेत.