महाविकास आघाडी सरकार असताना आदित्य ठाकरे हे पर्यावरण खात्याचे मंत्री होते. त्यावेळी त्यांचा ड्रीम प्रोजेक्ट असलेला मुंबई येथील बीकेसीत त्यांनी कोट्यवधी निधी मार्फत सायकल ट्रॅक उभारला होता. हा सायकल ट्रॅक 9.90 किलोमीटर लांबीचा आहे. मात्र आता MMRDA या सायकल ट्रॅकवर हातोडा चालवणार आहे. यासाठी MMRDA तब्बल 25 कोटी रुपये खर्च करणार असून कंत्राटदार नेमुणुकीची प्रक्रिया देखील सुरू केली आहे.

बीकेसीत तब्बल 10.8 किमी पदपथ आहेत. त्यालगत 9.9 किमी लांबीचे सायकल ट्रॅकही माजी मंत्री आदित्य ठाकरे यांनी उभारले आहे. यातील पदपथांची रुंदी 4 ते 7 मीटरपर्यंत तर सायकल ट्रॅक 1.5 ते 2.7 मीटर रुंदीचे आहेत. मात्र, दररोज बीकेसीत कामानिमित येणाऱ्यांची संख्या 6 लाखांवर पोहोचल्यामुळे गर्दीच्या वेळेत येथे वाहतूक कोंडी नेहमीची डोकेदुखी ठरत आहे. या परिस्थितीच सायन पूल वाहतुकीसाठी बंद केल्याने ती वाहतूकही आता बीकेसीतून वळविली जात आहे. यामुळे MMRDA ने हा निर्णय घेतल्याचे सांगितले जात आहे.