धाराशिव: यंदा मे महिन्याच्या पंधरवाड्यातच अवकाळी पाऊस आल्याने राज्यात शेतकऱ्यांचे मोठे नुकसान झाले आहे. तसेच लवकर मान्सून दाखल झाल्याने सर्वत्र पाणीच पाणी असल्याने काही ठिकाणी पूरसदृश्य परिस्थिति देखील निर्माण झाली आहे. अशातच धाराशिवमध्ये मोठी घटना घडली आहे.

धाराशिवच्या तुळजापूर तालुक्यातील मोर्डा शिवारातील तब्बल पन्नास वर्षांपूर्वी बांधण्यात आलेला पाझर तलाव पावसाने ओव्हर फ्लो होऊन फुटल्याने या भागातील शेतकऱ्यांची संपूर्ण शेतजमीन व पिकं वाहून गेल्याने मोठं नुकसान झाले आहे. तलावाचा भरावाचा मलबा शेतात गेल्याने उसाच्या उभ्या पिकात पाच ते सहा फुटांचा थर साचला आहे. त्याखाली पिक गाडलं गेलं असून शेतकऱ्यांची विहीर बुजली आहे, पाईपलाईन वाहून गेली. पेरणी तोंडावर असताना शेतातील माती वाहून गेल्याने सगळीकडे दगडगोटे पाहायला मिळत आहेत.