Team India vice captain ruled out of South Africa tour : ऑस्ट्रेलियाविरोधातील अखेरचा सामना जिंकून टीम इंडियाने शेवट गोड केला. पण या सामन्यावेळी टीम इंडियाला मोठा धक्का बसला आहे. तिसऱ्या एकदिवसीय सामन्यादरम्यान उपकर्णधार श्रेयस अय्यरला गंभीर दुखापत झाली. हर्षित राणाच्या गोलंदाजीवर अ‍ॅलेक्स कॅरीचा झेल घेताना अय्यरच्या डाव्या बरगडीला दुखापत झाली. सुरुवातीच्या अहवालांनुसार तो किमान तीन आठवडे क्रिकेटपासून दूर राहू शकतो. आगामी दक्षिण आफ्रिकाविरोधात होणाऱ्या वनडेत त्याच्या खेळण्यावर प्रश्नचिन्ह उपस्थित झाले आहे.

शनिवारी अय्यर डीप स्क्वेअर लेगवर क्षेत्ररक्षण करत होता. त्यावेळी हर्षित राणाच्या चेंडूवर अॅलेक्स कॅरीने जोरात फटका मारला. अय्यरने झेल घेण्यासाठी एक उत्तम डायव्ह मारली, परंतु त्याच्या बरगड्यांना गंभीर दुखापत झाली. डॉक्टरांचे पथक ताबडतोब मैदानावर पोहोचले आणि अय्यरला तपासणीसाठी सिडनी येथील रुग्णालयात नेण्यात आले.

अय्यर तीन आठवड्यांसाठी मैदानाबाहेर

बीसीसीआयच्या एका वरिष्ठ अधिकाऱ्याने पीटीआयला अय्यरच्या दुखापतीबाबत माहिती दिली. त्याने सांगितले की, "सामनावेळी श्रेयस अय्यरला तातडीने रुग्णालयात नेण्यात आले. सुरुवातीच्या स्कॅनमध्ये बरगडीला दुखापत झाल्याचे दिसून आले आहे. त्याला किमान तीन आठवडे विश्रांती घेण्याचा सल्ला देण्यात आला आहे. जर हेअरलाइन फ्रॅक्चर असल्याचे आढळले तर बरे होण्यास जास्त वेळ लागू शकतो."

आफ्रिकाविरोधात खेळण्यावर प्रश्नचिन्ह

दरम्यान, श्रेयस अय्यरला रूग्णालयातून परतल्यानंतर सेंटर ऑफ एक्सलन्समध्ये दाखल व्हावे लागणार आहे. त्या ठिकाणी अय्यरच्या दुखापतीची चाचपणी करण्यात येईल. फिटनेस अहवाल आल्यानंतरच तो टीम इंडियामध्ये कधी परतू शकेल, याबाबत स्पष्ट होईल. या दुखापतीमुळे अय्यरचा दक्षिण आफ्रिका दौऱ्यातील सहभाग संशयाच्या भोवऱ्यात सापडला आहे. भारताचा पहिला एकदिवसीय सामना ३० नोव्हेंबर रोजी रांची येथे खेळला जाईल आणि तोपर्यंत अय्यर तंदुरुस्त होईल की नाही हे सध्या स्पष्ट नाही.