पॅरिस ऑलिंपिक स्पर्धेतील सहाव्या दिवशी भारतीय खेळाडूंनी घवघवीत यश मिळवलं आहे. मराठमोळ्या स्वप्नील कुसळेने ५० मीटर रायफल ३ पोझिशन शूटिंग प्रकारात कांस्यपदकाला गवसणी घातली आहे. यासह त्याने इतिहास रचला आहे.

स्वप्नील कुसळे हा पॅरिस ऑलिंपिक २०२४ स्पर्धेत पदक जिंकणारा तिसरा खेळाडू ठरला आहे. यापू्र्वी मनू भाकरने १० मीटर पिस्तूल शूटिंग प्रकारात कांस्यपदक पटकावलं होतं. त्यानंतर मनू भाकर आणि सरबज्योत सिंग या जोडीने १० मीटर पिस्तूल शूटिंग मिश्र प्रकारात कांस्यपदक पटकावलं होतं.

असा कारनामा करणारा ठरला पहिलाच भारतीय

यापूर्वी कुठल्याच भारतीय खेळाडूला पुरुषांच्या ५० मीटर रायफल ३ प्रोझिशन शुटिंग प्रकारात ऑलिंपिक पदक जिंकता आलं नव्हतं. या प्रकारात ऑलिंपिक पदक जिंकणारा तो पहिलाच भारतीय नेमबाज ठरला आहे. यासह ऑलिंपिक स्पर्धेत पदक जिंकणारा महाराष्ट्रातील दुसराच खेळाडू ठरला आहे.

स्वप्नील कुसळेने ५० मीटर रायफल ३ पोझिशन प्रकारातील फायनलमध्ये ४५१.४ गुणांची कमाई करत कांस्यपदक पटकावलं. हे महाराष्ट्राच्या सुपुत्राने पटकावलेलं दुसरं पदक ठरलं आहे. यापूर्वी खाशाबा जाधव यांनी ऑलिंपिक स्पर्धेत पदक पटकावलं होतं.

यापूर्वी २००४ मध्ये राज्यवर्ध राठोड यांनी भारताला शूटिंगमध्ये पहिलं पदक मिळवून दिलं होतं. त्यांनी अथेन्स ऑलिम्पिक स्पर्धेत हा कारनामा केला होता. त्यानंतर अभिनव बिंद्राने बीजिंग ऑलिंपिक स्पर्धेत सुवर्ण पदकावर नाव कोरलं होतं. २०१२ मध्ये झालेल्या ऑलिंपिक स्पर्धेत गगन नारंग आणि विजय कुमार यांनी शूटिंगमध्ये भारताला २ पदकं मिळवून दिली होती.