Shubman Gill Catch: भारतीय संघाचा क्षेत्ररक्षणाचा स्तर हा गेल्या काही वर्षांमध्ये उंचावला आहे. भारतीय संघात विराट कोहली, रविंद्र जडेजा आणि शुभमन गिल सारखे काही उत्कृष्ठ क्षेत्ररक्षक आहेत.

नुकताच सुरू असलेल्या भारत विरूद्ध वेस्टइंडीज यांच्यातील पहिल्या कसोटी सामन्यात देखील भारतीय संघाकडून उत्तम क्षेत्ररक्षणाचा नमुना पाहायला मिळाला आहे. शुभमन गिलने एक भन्नाट झेल टिपला आहे. ज्याचा व्हिडिओ सध्या सोशल मीडियावर तुफान व्हायरल होऊ लागला आहे.

गिलने हा झेल आर अश्विनच्या गोलंदाजीवर टिपला आहे. तर झाले असे की, भारतीय संघाची गोलंदाजी सुरू असताना ६५ वे षटक टाकण्यासाठी आर अश्विन गोलंदाजीला आला होता. त्यावेळी तिसऱ्याच चेंडूवर आर अश्विनने विकेट मिळवली. हा वेस्टइंडीचच्या पहिल्या डावातील शेवटचा विकेट होता.

गिलचा भन्नाट झेल..

युवा फलंदाज शुभमन गिल देखील उत्तम दर्जाचा क्षेत्ररक्षक आहे. अनेकदा त्याने स्लीप आणि शॉट लेगला क्षेत्ररक्षण करत असताना अशक्य वाटत असलेले झेल सहज टिपले आहेत. यावेळी देखील असेच काहीसे चित्र पाहायला मिळाले आहे.

अश्विनच्या गोलंदाजीवर फलंदाजी करत असलेल्या वारिकनचा चेंडू ग्लोव्हला जाऊन लागला. त्यावेळी शॉर्ट लेगला क्षेत्ररक्षण करत असलेल्या शुभमन गिलने डाईव्ह मारत हा झेल टिपला. अंपयारने निर्णय घेण्यापूर्वी अश्विन आणि गिलला विचारलं, मात्र गिलला खात्री नव्हती. (Shubman Gill Catch Video)

त्यामुळे हा निर्णय तिसऱ्या अंपायरकडे पाठवण्यात आला होता. रिव्ह्यू पाहून तिसऱ्या अंपायरने त्याला बाद घोषित केलं. हा व्हिडिओ सध्या सोशल मीडियावर जोरदार व्हायरल होऊ लागला आहे. (Latest sports updates)

भारतीय संघाची दमदार सुरूवात..

या सामन्यात वेस्टइंडीज संघाने नाणेफेक जिंकून प्रथम फलंदाजी करण्याचा निर्णय घेतला होता. या सामन्यात वेस्टइंडीजचा पहिला डाव अवघ्या १५० धावांवर संपुष्टात आला. भारतीय संघाकडून आर अश्विनने सर्वाधिक ५ गडी बाद केले.

तर भारतीय संघाकडून फलंदाजी करण्यासाठी आलेल्या कर्णधार रोहित शर्मा आणि पदार्पणवीर यशस्वी जयस्वालने संघाला चांगली सुरूवात करून दिली. यशस्वी जयस्वाल ४० तर कर्णधार रोहित शर्मा ३० धावांवर नाबाद आहे. दोघांनी मिळून आतापर्यंत ८० धावा जोडल्या आहेत.