Shubman Gill : गुजरात टायटन्सचे आघाडीचे तिन्ही खेळाडू IPL 2025 मध्ये उत्कृष्ट कामगिरी करत आहेत. साई सुदर्शन, शुबमन गिल आणि जोस बटलर तिघेही चांगल्या फॉर्ममध्ये आहेत. हे तिघेही ऑरेंज कॅपच्या यादीत आहेत. गिलने यंदाच्या सीझनमध्ये ४४६५ धावा केल्या आहेत. कालच्या (२ मे) गुजरात विरुद्ध हैदराबाद सामन्यात शुबमन गिलने ७६ धावा केल्या.

शुबमन गिलने मागील ६ आयपीएल सीझन्समध्ये ४०० पेक्षा जास्त धावा केल्या आहेत. २०२३ मध्ये त्याने सर्वाधिक ८९० धावांचा यशस्वी विक्रम रचला होता. सततच्या उत्कृष्ट फलंदाजीमुळे त्याची तुलना विराट कोहलीशी केली जात आहे. गिल हा विराटचा उत्तराधिकारी आहे असेही काहीजण म्हणत असतात. जिओहॉटस्टारवर बोलताना माजी क्रिकेटपटू अजय जडेजा यांनी गिलच्या जबरदस्त फॉर्मचे कौतुक केले.

गुजरात विरुद्ध हैदराबाद सामन्याच्यानंतर अजय जडेजा यांनी गिलची तुलना विराट कोहलीशी केली. ते म्हणाले, 'शुबमन गिल नेहमीच चांगली खेळी करतो. त्याचा खेळीत सातत्य पाहायला मिळते. आपल्या देशात विराट कोहली आहे, पण गिलही काही कमी नाही. जर तुम्ही गिलच्या धावा काढण्याच्या सातत्येकडे पाहिले, तर ती शैली विराट कोहलीप्रमाणेच आहे. कौशल्याच्या बाबतीत गिल उत्कृष्ट फलंदाज आहे. परिस्थिती सांभाळून तो फलंदाजी करतो. गरज नसताना चुकीचा शॉट मारुन तो बाद झाला हे फारच क्वचित पाहायला मिळते.'

आयपीएल २०२५ मधील ५१ वा सामना गुजरात टायटन्स विरुद्ध सनरायजर्स हैदराबाद यांच्यात खेळला गेला. या सामन्यात गुजरातचा कॅप्टन शुबमन गिलने तब्बल दोनदा हुज्जत घातली. फलंदाजी दरम्यान शुबमनने रनआउटच्या मुद्द्यावरुन थेट चौथ्या अंपायरसोबत राडा घातला. त्यानंतर हैदराबादची फलंदाजी असताना अभिषेक शर्माच्या पॅडच्या चेंडू लागल्यानंतरही शुबमन गिल भडकला. एकाच सामन्यात दोन वेळा अंपायर्ससोबत बाचाबाची केल्याने गिलवर नक्कीच कारवाई होऊ शकते असे म्हटले जात आहे.