भारतीय खेळाडूंनी १२ वर्षांची प्रतीक्षा संपवत अखेर चॅम्पियन्स ट्रॉफी स्पर्धेची ट्रॉफी उंचावली आहे. या स्पर्धेतील फायनलमध्ये भारत आणि न्यूझीलंड हे दोन्ही बलाढ्य संघ आमनेसामने आले होते. या सामन्यात भारतीय खेळाडूंनी दमदार खेळ केला आणि न्यूझीलंडला पराभवाची धूळ चारली.

या ऐतिहासिक विजयानंतर भारतीय खेळाडूंसह कोट्यवधी भारतीयांनी जल्लोष साजरा केला. ज्याचे अनेक व्हिडिओ सोशल मीडियावर व्हायरल होतोय. या विजयामुळे भारतीय फॅन्सला २०२३ वर्ल्डकप पराभवाचं दुःख विसरण्याची संधी मिळाली.

आयसीसी वनडे वर्ल्डकप २०२३ स्पर्धेपासून भारतीय संघात एक नवीन परंपरा सुरू करण्यात आली आहे. प्रत्येक सामन्यात उत्कृष्ट क्षेत्ररक्षण करणाऱ्या खेळाडूला बेस्ट फिल्डरचं मेडल दिलं जातं. ही परंपरा फायनलचा सामना झाल्यानंतरही कायम ठेवण्यात आली. हे मेडल सामना झाल्यानंतर ड्रेसिंग रूममध्ये दिलं जातं. प्रत्येक वेळी हे मेडल वेगवेगळ्या पद्धतीने दिलं जातं.

भारत आणि न्यूझीलंड यांच्यातील फायनलचा सामना झाल्यानंतर, मेडल देण्याचा कार्यक्रम पार पडला. ज्याचा व्हिडिओ बीसीसीआयने आपल्या सोशल मीडिया अकाऊंटवरून शेअर केला आहे. या व्हिडियोमध्ये तुम्ही पाहू शकता की, भारतीय संघाचे क्षेत्ररक्षक प्रशिक्षक टी दिलीप भारतीय संघाचं कौतुक करताना दिसून आले. कौतुक केल्यानंतर त्यांनी रोहित शर्मा आणि रविंद्र जडेजा यांना पुरस्कार जिंकण्यासाठी उमेदवार जाहीर केलं.

तुम्ही यापूर्वीही अनेकदा हा पुरस्कार सोहळा पाहिला असेल. कधी मोठ्या पडद्यावर तर कधी एखादा दिग्गज खेळाडू येऊन हा पुरस्कार देऊन जातो. मात्र यावेळी टी दिलीप यांनी विजेत्याचं नाव जाहीर करण्यासाठी फार वेळ घेतला नाही. त्यांनी मेडल जडेजाच्या गळ्यात घातलं. जडेजाने या सामन्यात उत्कृष्ट क्षेत्ररक्षण केलं. या क्षेत्ररक्षणाच्या बळावर त्याने हे मेडल पटकावलं. यासह शेवटी चौकार मारून जडेजाने भारतीय संघाला विजय मिळवून दिला.