वेस्टइंडीजचा वजनदार खेळाडू रहकिम कॉर्नवॉल हा गेल्या काही दिवसांपूर्वी आपल्या फिटनेसमुळे चर्चेत आला होता. कासव गतीने धावल्यामुळे हा फलंदाज धावबाद झाला होता. त्यामुळे त्याला टीकेचा सामना करावा लागला होता.
आता त्याने तुफानी शतकी खेळी करत टीका करणाऱ्यांना सडेतोड उत्तर दिले आहे. कॅरिबियन प्रीमियर लीग स्पर्धेत त्याने अवघ्या ४५ चेंडूंमध्ये आपले शतक पूर्ण केले आहे.
रहकिम कॉर्नवॉलने सेंट किट्स अँड नेविस संघाविरूद्ध झालेल्या सामन्यात त्याने ४ चौकार आणि १२ षटकारांसह ४५ चेंडूंमध्ये शतक पूर्ण केले आहे. यादरम्यान त्याने २१२.५० च्या स्ट्राइक रेटने धावा केल्या आहेत.
या शतकी खेळीनंतर त्याने हटके सेलिब्रेशन केल्याचे देखील पाहायला मिळाले आहे. शतक पूर्ण करताच त्याने बॅट हवेत नेत खाली फेकली. या बॅट ड्रॉप सेलिब्रेशनचा व्हिडिओ सध्या सोशल मीडियावर जोरदार व्हायरल होऊ लागला आहे.
बारबाडोस संघाचा विजय...
रहकिम कॉर्नवॉलच्या या खेळीच्या बळावर बारबाडोस संघाने २२१ धावांच्या आव्हानाचा यशस्वीरित्या पाठलाग केला आहे. सेंट किट्स अँड नेविस प्रेटियट्स संघाने प्रथम फलंदाजी करताना २० षटकअखेर ४ गडी बाद २२० धावा केल्या होत्या.
सेंट किट्स अँड नेविस प्रेटियट्स संघाकडून विल समीदने ६३ आणि शेरफन रुदरफोर्डने ६५ धावांची खेळी केली. तर सलामीला आलेल्या आंद्रे फ्लेचरने ५६ धावांची ताबडतोड खेळी केली होती. (Latest sports updates)
शतक झळकावल्यानंतर झाला रिटायर्ड..
रहकिम कॉर्नवॉलने आपल्या खेळीदरम्यान तुफान फटकेबाजी केली. विरोधी संघातील गोलंदाज त्याला बाद करू शकले नव्हते. शेवटी त्याने स्वत:च मैदान सोडण्याचा निर्णय घेतला होता. २२१ धावांचा पाठलाग करत असताना रहकिम कॉर्नवॉलसह रोमेन पॉवेलने २६ चेंडूंचा सामना करत ४९ धावांची खेळी केली.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.