Pro Kabaddi News In Marathi:

प्रो कबड्डीच्या दहाव्या हंगामातील मुंबई लेगचा शेवटचा सामना यु मुंबा आणि हरियाणा स्टीलर्स या दोन्ही संघांमध्ये पार पडला. जयदीप दहीयाच्या ८ पकडींबरोबरच चढाईत १४ गुण मिळवणारा आमीर मोहम्मद जाफर दानिश हे दोघे सामन्याचे मुख्य आकर्षण ठरत असताना हा सामना ४४-४४ असा बरोबरीत सुटला.

एनएससीआय स्टेडियम झालेल्या या लढतीत हरियाणा स्टिलर्सने अतिशय वेगवान प्रारंभ करताना जयदीप दहियाच्या पकडीमुळे यु मुंबावर सातव्याच मिनिटाला पहिला लोन चढवून ११-६ अशी आघाडी घेतली.पिछाडीवर असलेल्या यु मुंबाने आमीर मोहम्मद जाफर दानिशच्या चढाया आणि सिध्दार्थ देसाईच्या सुपर रेडने सावरले व त्यांची पिछाडी मध्यंतराला केवळ तीन गुणांवर आणली. (Latest sports updates)

मध्यंतरानंतर मात्र, हरियाणा स्टिलर्सच्या खेळाडूंनी उत्कृष्ट चढाया आणि सुपर टॅकलच्या साहाय्याने आपली आघाडी ९ गुणांवर नेली. यु मुंबा संघाने सावध खेळ करताना टप्प्याटप्याने गडी बाद करत हरियाणा स्टिलर्सवर पहिला लोन चढवित ३०-३० अशी बरोबरी साधली.

मात्र, पूर्वीप्रमाणेच हरियाणा स्टिलर्सने झटपट पुनरागमन करताना यु मुंबावर लोन चढवून पुन्हा ५ गुणांची आघाडी मिळवली. सामन्याचा निकाल स्पष्ट होत असतानाच यु मुंबा संघाने हरियाणा स्टिलर्सवर दुसरा लोन चढवून केवळ ४० सेकंद बाकी असताना ४४-४४ अशी बरोबरी साधली. उरलेल्या वेळात ही कोंडी फुटू शकली नाही. त्यामुळे ही लढत बरोबरीतच संपली.