प्रो कबड्डी 2024 स्पर्धेच्या पार्श्वभूमीवर मुंबईमध्ये खेळाडूंचा लिलाव सुरू आहे. या लिलावाच्या पहिल्या दिवशी खेळाडूंवर कोट्यवधींची बोली लागली. तर दुसऱ्या दिवशी अनेक स्टार खेळाडू अन्सोल्ड राहिले. ज्यात राहुल चौधरी सारख्या खेळाडूंचाही समावेश आहे.

एकेकाळी प्रो कबड्डी गाजवणाऱ्या राहुल चौधरीचा या हंगामासाठी सी कॅटेगरीत समावेश करण्यात आला होता. त्याची बेस प्राईज १३ लाख रुपये होती. मात्र ज्यावेळी त्याचं नाव पुकारलं गेलं. त्यावेळी कोणीच बोली लावली नाही.

राहुल चौधरीसारखा अनुभवी खेळाडू अन्सोल्ड होणं ही अतिशय मोठी गोष्ट आहे. कारण त्याला बऱ्याच वर्षांचा अनुभव आहे. असा खेळाडू संघात असल्याने संघातील युवा खेळाडूंनाही फायदा होत असतो.

राहुल चौधरीची कारकीर्द

राहुल चौधरी हा प्रो कबड्डी स्पर्धेच्या पहिल्या हंगामापासून खेळतोय. गेली २ वर्ष तो जयपूर पिंक पँथर्स संघाकडून खेळतोय. स्पर्धेतील नवव्या हंगामात जयपुर पिंक पँथर्स संघाने जेतेपदाचा मान मिळवला होता. त्यानंतर दहाव्या हंगामात त्याला जास्त सामने खेळण्याची संधी मिळाली नव्हती. बरेच दिवस त्याला संघाबाहेर राहावं लागलं होतं.

अजूनही आहे संधी

लिलावातील पहिल्या फेरीत तो अन्सोल्ड झाला असला तरीदेखील त्याच्याकडे आणखी एक संधी असणार आहे. कारण अन्सोल्ड झालेल्या खेळाडूंना आणखी एक संधी मिळते. या खेळाडूंवर पुन्हा एकदा बोली लावली जाते. त्यामुळे राहुल चौधरीवर पुन्हा एकदा बोली लावली जाऊ शकते. यासह इतर खेळाडूंनाही आणखी एक संधी मिळणार आहे.