पॅरिस ऑलिम्पिक २०२४ स्पर्धेत भारताला पाचवं पदक निश्चित करण्याची संधी होती. ५७ किलो ग्रॅम वजनी गटातील फ्री स्टाईल कुस्ती प्रकारात अमन सेहरावत (Aman Sehrawat) आणि जपानचा हिगुची रेई हे दोन्ही खेळाडू आमनेसामने आले होते. या सामन्यात भारतीय पैलवान अमनला अवघ्या २ मिनिटात पराभवाचा सामना करावा लागला आहे.

अमनला हा सामना जिंकून आपलं एक पदक निश्चित करण्याची संधी होती. मात्र या सामन्यात त्याला १२-० ने पराभवाचा सामना करावा लागला आहे. सुवर्ण आणि रौप्यपदकाची संधी हुकली असली तरीदेखील त्याला कांस्यपदक पटकावण्याची संधी असणार आहे. त्याचा कांस्यपदकासाठीचा सामना उद्या रात्री १० वाजता होणार आहे.

या सामन्याबद्दल बोलायचं झालं, तर हिगुची रेई आणि अमन यांच्यात एकतर्फी लढत पाहायला मिळाली. हिगुची रेईने सामना सुरु होताच अमनवर आक्रमण केलं. त्यानंतर अमनवर दबाव वाढला. त्याला काहीही करुन पॉईंट स्कोअर करायचे होते. मात्र हिगुची रेईने त्याला संधीच दिली नाही. त्याने १०-० ने आघाडी घेताच अवघ्या २ मिनिटात रेफ्रीने हिगुची रेईला विजयी घोषित केलं

भारतीय कुस्तीपटू अमन सेहरावतने शानदार पॅरिस ऑलिम्पिक २०२४ स्पर्धेत शानदार खेळ केला. त्याने उप उपांत्य फेरीतील सामन्यात अल्बानियाच्या पैलवानाला आस्मान दाखवलं. या सामन्यात त्याने १२-० ने बाजी मारली. यासह उपांत्यफेरीत प्रवेश मिळवला होता.

अशी राहिलीये कारकिर्द

अमन सेहरावतने आतापर्यंत शानदार खेळ करुन दाखवला आहे. वयाच्या २१ व्या वर्षी त्याने मोठ मोठ्या स्पर्धांमध्ये सुवर्णपदकाला गवसणी घातली आहे. त्याने झाग्रेबमध्ये झालेल्या स्पर्धेत सुवर्ण पदकावर नाव कोरलं होतं. याआधी झालेल्या एशियन चॅम्पियनशिपमध्येही त्याने सुवर्णपदक पटकावलं होतं. पॅरिस ऑलिम्पिक स्पर्धेत तो ५७ किलो ग्रॅम वजनी गटात खेळण्यासाठी उतरला आहे.