पॅरिस ऑलिम्पिक २०२४ स्पर्धेतील ७ ऑगस्ट हा दिवस कोणीच विसरु शकणार नाही. भारतीय कुस्तीपटू विनेश फोगाटने ५० किलोग्रॅम वजनी गटातील फ्री स्टाईल प्रकारात फायनलमध्ये प्रवेश केला होता. मात्र १०० ग्रॅम वजन अधिक असल्याने तिला अपात्र ठरवण्यात आलं होतं. मात्र पॅरिसमधून मोठी बातमी समोर येत आहे. अपात्र ठरवल्यानंतर तिने CAS कडे दाद मागितली होती. दरम्यान तिने केलेला अर्ज स्वीकार करण्यात केला असून लवकरच याबाबत निर्णय घेतला जाणार आहे.

नेमकं काय घडलं?

भारताची स्टार कुस्तीपटू विनेश फोगाटने पॅरिस ऑलिम्पिक स्पर्धेतील ५० किलो ग्रॅम वजनी गटातील फ्री स्टाईल कुस्ती प्रकारात सहभाग घेतला होता. तिने पहिल्या दिवशी ३ सामने जिंकले. यादरम्यान तिने वर्ल्ड नंबर १ खेळाडूला पराभूत करत फायनलमध्ये प्रवेश केला होता. मात्र फायनलच्या दिवशी तिचं वजन १०० ग्रॅम अधिक असल्याने तिला अपात्र ठरवण्यात आलं होतं. तिला अपात्र ठरवल्यानंतर देशभरातून तिला न्याय मिळवून देण्याची मागणी केली गेली होती.

विनेशने रौप्यपदक देण्याबाबत CAS कडे याचिका केली होती. विनेशने ५० किलो ग्रॅम वजनासह फायनलमध्ये प्रवेश केला होता. त्यामुळे तिने CAS कडे याचिका दाखल करत रौप्यपदक देण्याची मागणी केली होती. ही याचिका CAS ने स्वीकारली असून उद्या म्हणजेच ९ ऑगस्ट रोजी सकाळी ११:३० वाजता याबाबत निर्णय दिला जाणार आहे.

निवृत्तीची केली घोषणा

अपात्रतेच्या निर्णयानंतर विनेश फोगाटने कुस्तीला रामराम केला आहे. तिने आपल्या एक्स अकाऊंटवर पोस्ट शेअर करत निवृत्ती घेत असल्याची घोषणा केली आहे. तिने निवृत्ती घेतली असली, तरीदेखील पदक मिळण्याची आशा अंतिम निर्णय येईपर्यंत कायम आहे.