नवी दिल्ली: पॅरिस ऑलिम्पिक सुरू होण्यासाठी फक्त दोन महिने बाकी राहिलेत. भारतीय खेळाडूंनी ऑलिम्पिकसाठी आपली तयारी सुरू केलीय. भारतात यासाठी ट्रायलही सुरू करण्यात आलेत. याचदरम्यान भारतीय कुस्ती महासंघाने एक मोठा निर्णय घेतलाय. राखीव कोटा मिळालेल्या कुस्तीपटूंना आता थेट पॅरिस ऑलिम्पिकमध्ये प्रवेश मिळणार आहे.

भारतीय कुस्ती महासंघाचे अध्यक्ष संजय सिंह यांनी इतर अधिकाऱ्यांसह मिळून जुने नियम मोडीत काढत हा निर्णय घेतलाय. मात्र त्याची अधिकृत घोषणा अद्याप झालेली नाही. परंतु या निर्णयामुळे विनेश फोगटसह ६ कोटा कुस्तीपटूंना ऑलिम्पिकसाठी चाचण्या द्याव्या लागणार नाहीत.

भारतीय कुस्ती संघ काही कुस्तीपटूंना पात्रता स्पर्धांद्वारे ऑलिम्पिकमध्ये थेट प्रवेश देत होता. परंतु लैंगिक शोषण प्रकरणातील संशयित आरोपी असलेल्या ब्रिजभूषण सिंह यांच्या अध्यक्षतेखाली WFI ने कोटा असूनही २०२१ मध्ये चाचण्यांसाठी नियम बदलला होता. या नियमामुळे तरुण खेळाडूंना संधी दिली जाऊ शकते. ऑलिम्पिक कोटा मिळाल्यानंतर अमन सेहरावत आणि निशा दहियासह काही कुस्तीपटूंनी चाचण्यांच्या समस्येचे कारण देत कुस्ती संघटनेला ट्रायल्स थांबवण्यास सांगितले होते.

द ट्रिब्यूनने आपल्या अहवालात डब्ल्यूएफआयच्या सूत्रांचा हवाला दिला आहे की, युनियनमधील बहुतेक अधिकारी चाचणी न घेण्याच्या बाजूने आहेत. रिपोर्टनुसार, असोसिएशनचे म्हणणे आहे की कुस्तीपटूंसाठी वजन राखणे ही सर्वात मोठी समस्या आहे. अनेक खेळाडूंनी त्यांना पत्र लिहून दुखापतीची भीती व्यक्त केली होती. ऑलिम्पिकपूर्वी सर्व कुस्तीपटूंनी तंदुरुस्त राहावे, अशी भारतीय कुस्ती संघटनेची इच्छा आहे. या गोष्टी लक्षात घेऊन हा निर्णय घेण्यात आल्याचं सांगितलंय.