पाकिस्तानचा माजी वेगवान गोलंदाज शोएब अख्तरवर दुःखाचा डोंगर कोसळला आहे. त्याचा मोठा भाऊ शाहिद अख्तरचे निधन झाले असून ही दुःखद माहिती स्वतः शोएब अख्तरने सोशल मीडियाच्या माध्यमातून दिली आहे. भावाच्या निधनामुळे अख्तर कुटुंबावर शोककळा पसरली असून क्रिकेट चाहत्यांकडूनही हळहळ व्यक्त केली जात आहे.

शाहिद अख्तर फिटनेस ट्रेनर आणि फिजिओथेरपिस्ट होता. शोएबच्या फिटनेसमध्ये त्याचा मोठा खारीचा वाटा होता. क्रिकेटच्या मैदानावर अनेक फलंदाजांना आपल्या वेगवान गोलंदाजीने हादरवणारा शोएब आज मात्र भावाच्या निधनामुळे पूर्णपणे खचलेला पाहायला मिळाला. यापूर्वी 2021 मध्ये शोएब अख्तरच्या आईचे निधन झाले होते. त्या धक्क्यातून सावरत असतानाच आता मोठ्या भावाच्या निधनाने त्याच्या आयुष्यात आणखी एक मोठी पोकळी निर्माण झाली आहे.

शोएब अख्तरने फेसबुकवर पोस्ट शेअर करत आपल्या भावाच्या निधनाची माहिती दिली आहे. त्याने पोस्टमध्ये लिहिले आहे की , “अत्यंत दुःखाने मला तुम्हाला कळवावे लागत आहे, माझा मोठा भाऊ शाहिद अख्तर याचे निधन झाले आहे.” यासोबतच अंत्यविधीची वेळ आणि ठिकाणाची माहिती नंतर जाहीर करण्यात येईल, असेही त्याने सांगितले.

कुटुंबातील अत्यंत जवळची व्यक्ती गमावल्याने त्याच्यावर दुःखाचा डोंगर कोसळला आहे. शोएब अख्तरच्या या दुःखद प्रसंगानंतर जगभरातील क्रिकेट चाहते आणि खेळाडूंनी सोशल मीडियावरून श्रद्धांजली अर्पण करत आहेत. अनेकांनी शाहिद अख्तर यांच्या आत्म्यास शांती लाभो, अशी प्रार्थना केली आहे.