Manu Bhaker News : आंतरराष्ट्रीय नेमबाजीपटू मनू भाकेरच्या घरी दुखद घटना घडली आहे. तिच्या आजीचा आणि मामाचा अपघातात मृत्यू झाला आहे. आज (१९ जानेवारी) सकाळी ९ च्या सुमारास हा भीषण अपघात झाला. ही घटना हरियाणाच्या महेंद्रगड बायपास रोडवर घडली आहे. या प्रकरणी पोलिसांनी तपास करायला सुरुवात केली आहे.

सकाळी नऊच्या सुमारास महेंद्रगड बायपास रोडवर स्कूटर आणि ब्रेझा कार यांची टक्कर झाली. ही टक्कर इतकी भीषण होती की त्यात मनू भाकेरची आजी आणि मामा जागीच ठार झाले. अपघात झाल्यानंतर कार चालक घटनास्थळावरुन पळून गेल्याची प्राथमिक माहिती समोर आली आहे.

या अपघाताची माहिती मिळताच स्थानिक पोलीस घटनास्थळी दाखल झाले. त्यांनी दोन्ही मृतदेह ताब्यात घेतले आणि पुढील तपासासाठी सिव्हिल हॉस्पिटलमध्ये पाठवले. पोलिस घटनेचा तपास करत आहेत. ब्रेझा कारच्या चालकाला पकडण्यासाठी पोलिसांचे प्रयत्न सुरु झाले आहेत.

अपघाताच्या दोन दिवसांपूर्वी १७ जानेवारीला मनू भाकेरला मेजर ध्यानचंद खेलरत्न पुरस्कार मिळाला होता. पॅरिस ऑलिम्पिकमध्ये मनूने १० मीटर एअर पिस्तूल (वैयक्तिक) आणि १० मीटर एअर पिस्तूल (सांघिक) या दोन स्पर्धांमध्ये दोन कांस्य पदके जिंकली होती. एकाच ऑलिम्पिकमध्ये दोन मेडल जिंकणारी ती पहिली भारतीय खेळाडू आहे.