आधी फिल्डींग म्हटलं की, ऑस्ट्रेलियाच्या खेळाडूंचं नाव आघाडीवर असायचं. मात्र आता न्यूझीलंडच्या खेळाडूंनी ऑस्ट्रेलियाच्या खेळाडूंनाही मागे सोडलं आहे.

आधी ग्लेन फिलिप्सच्या अफलातून कॅचेसचे व्हिडिओ सोशल मीडियावर तुफान व्हायरल झाले होते. आता न्यूझीलंडचा खेळाडू नॅथन स्मिथने बाउंड्री लाईनवर उघड्या डोळ्यांनी विश्वास बसणारच नाही, असा झेल टिपला. ज्याचा व्हिडिओ सध्या सोशल मीडियावर तुफान व्हायरल होतोय.

श्रीलंकेचा संघ न्यूझीलंड दौऱ्यावर आहे. दोन्ही संघांमध्ये वनडे मालिकेचा थरार सुरू आहे. दोन्ही संघांमधील ३ वनडे सामन्यांच्या मालिकेतील दुसरा सामना बुधवारी पार पडला. या सामन्यात नॅथन स्मिथने बाऊंड्री लाईनवर धावत जाऊन भन्नाट झेल घेतला.

तर झाले असे की, श्रीलंकेचा संघ प्रथम फलंदाजी करण्यासाठी मैदानात उतरला. प्रथम फलंदाजी करताना २९ वे षटक टाकण्यासाठी विल ओ रुडकी गोलंदाजी करण्यासाठी आला. या षटकातील शेवटचा चेंडू त्याने शॉर्ट लेंथवर टाकला.

या चेंडूवर फलंदाजी करत असलेल्या मलिंगाने लाँग ऑफच्या दिशेने शॉट खेळण्याचा प्रयत्न केला. मात्र चेंडू बॅटची कडा घेत थर्ड मॅनच्या हातात गेला. त्यावेळी स्मिथ थर्ड मॅनला फिल्डिंग करत होता. तो धावत गेला आणि त्याने हवेत डाईव्ह मारत अविश्वसनीय झेल घेतला. या झेलचा व्हिडिओ सध्या सोशल मीडियावर तुफान व्हायरल होतोय.

नॅथन स्मिथने घेतलेल्या या झेलची सोशल मीडियावर तुफान चर्चा सुरू आहे. हा व्हिडिओ न्यूझीलंड क्रिकेटच्या अधिकृत सोशल मीडिया अकाऊंटवरून शेअर करण्यात आला आहे. एका युझरने कमेंट करत लिहिले की, ' न्यूझीलंडला उडायचं कसं हे चांगलच माहीत आहे. कॅचेस तुम्हाला सामने जिंकून देतात..' तर आणखी एका युजरने लिहिले की, ' न्यूझीलंडची फिल्डींग ही जगात भारी आहे..' हा व्हिडिओ सोशल मीडियावर प्रचंड शेअर केला जातोय.