सर्बियाचा स्टार टेनिसपटू नोवाक जोकोविचने आपल्या कारकिर्दीत सर्वकाही जिंकलं. मात्र एक गोष्ट होती जी त्याला आपल्या संपूर्ण कारकिर्दीत जिंकता आली नव्हती. ती म्हणजे ऑलिम्पिक गोल्ड मेडल. यापूर्वी त्याने आपल्या कारकिर्दीत कधीच ऑलिम्पिक मेडल जिंकलं नव्हतं. मात्र पॅरिस ऑलिम्पिक २०२४ स्पर्धेतील फायनलमध्ये त्याने कार्लोस अल्काराझला पराभूत करत पहिल्यांदाच गोल्ड मेडल जिंकलं आहे. यासह तो ऑलिम्पिक स्पर्धेत टेनिसमध्ये मेडल जिंकणारा सर्वात वयस्कर खेळाडू ठरला आहे.

नोवाक जोकोविचने या स्पर्धेतील सेमिफायनलमध्ये लोरेन्झो मुसेट्टीचा पराभव करत फायनलचं तिकीट मिळवलं. जोकोविचने लोरेन्झो मुसेट्टीचा ६-४, ६-२ असा पराभव केला होता. तर कार्लोस अल्काराझने कॅनडाच्या फेलिक्स ऑगर आलियासिमचा ६-१,६-१ ने पराभव केला होता.

हे दोन्ही खेळाडू आपला ऑलिम्पिकचा पहिलाच सामना खेळण्यासाठी मैदानात उतरले होते. हा सामना जोकोविचसाठी अतिशय महत्वाचा होता,कारण ४ ऑलिम्पिक स्पर्धेत त्याला एकदाही गोल्ड मेडल जिंकता आलं नव्हतं. त्यामुळे त्याने हा सामना जिंकण्यासाठी पूर्ण जोर लावला. त्याने विम्बल्डन स्पर्धेतील फायनलच्या पराभवाचा बदला घेत कार्लोसला ७-६, ६-२ ने धुळ चारली. यासह १९८८ नंतर तो ऑलिम्पिक टेनिस स्पर्धेत पदक जिंकणारा सर्वात वयस्कर खेळाडू ठरला आहे.

आपल्या कारकिर्दीत २४ ग्रँड स्लॅम जिंकणाऱ्या जोकोविचला एकदाही ऑलिम्पिक मेडल जिंकता आलं नव्हतं. गेल्या ३ ऑलिम्पिक स्पर्धेतील रेकॉर्ड पाहिला,तर त्याला सेमिफायनलमध्ये पराभवाचा सामना करावा लागला होता. २००८ मध्ये झालेल्या बीजिंग ऑलिम्पिक स्पर्धेत त्याने कांस्यपदकावर नाव कोरलं होतं. त्यानंतर २०१२ लंडन ऑलिम्पिक, २०२१ मध्ये झालेल्या टोकियो ऑलिम्पिक स्पर्धेत त्याला चौथ्या क्रमांकावर समाधान मानावं लागलं होतं.