Nitu Ghanghas and Saweety Boora : भारतात सुरु असलेल्या जागतिक महिला बॉक्सिंग चॅम्पियनशिप स्पर्धेत भारतीय खेळाडूंनी घवघवीत यश मिळवत इतिहास रचला आहे.

भारताच्या नितु घंगस आणि स्वीटी बुरा यांनी शनिवारी जोरदार कामगिरी केली आणि भारताला सुर्वणपदक जिंकून दिले आहे.

नितु घंगसने ४८ किलो वजनी गटात मंगोलियाच्या लुत्सायखानला पराभूत करत ५-० ने विजय मिळवला. यात विशेष बाब म्हणजे कझाकस्तानची लुतसाईखान हिने दोन वेळेस आशियाई स्पर्धेत कांस्यपदक जिकंले होते.

तिच्या विरुद्ध खेळताना नितु जराही डगमगली नाही.

नितु नंतर स्वीटी बुराने ८१ किलो वजनी गटात चीनच्या वॅंग लिनाला धूळ चारली. तिने या सामन्यात ४-३ ने जोरदार विजय मिळवत सुवर्णपदकाला गवसणी घातली आहे.

यापूर्वी २०१४ मध्ये तिने जागतिक महिला बॉक्सिंग चॅम्पियनशिपच्या लाईट वेट कॅटेगरीमध्ये रौप्यपदकाला गवसणी घातली होती.

नितुने आक्रमक सुरुवात करत प्रतिस्पर्धी खेळाडूवर सुरुवातीपासूनच दबाव बनवून ठेवला होता. या विजयासह नितू जागतिक विजेतेपद जिंकणारी सहावी भारतीय बॉक्सर ठरली आहे.

या यादीत सहा वेळची चॅम्पियन मेरी कोम (२००२,२००५, २००६, २००८, २०१० आणि २०१८), सरिता देवी (२००६), जेनी आरएल (२००६), लेखा केसी (२००६) आणि निखत जरीन (२०२२) यांचा समावेश आहे.