Musheer Khan Helicopter Shot:

आयसीसी अंडर १९ वर्ल्डकप स्पर्धेतील सुपर ६ फेरीतील सामन्यांना प्रारंभ झाला आहे. या स्पर्धेत मंगळवारी झालेल्या सामन्यात भारत आणि न्यूझीलंड हे दोन्ही संघ आमने सामने होते. हा सामन्यात खेळाडूंनी दमदार खेळ करून न्यूझीलंडला २१४ धावांनी धूळ चारली आहे.

भारतीय संघाकडून मुशीर खान चमकला. त्याने पहिल्या डावात फलंदाजी करताना १३१ धावांची तुफानी खेळी केली. या खेळीदरम्यान त्याने हेलिकॉप्टर शॉट मारला, ज्याचा व्हिडिओ सध्या सोशल मीडियावर तुफान व्हायरल होत आहे.

हा सामना मेनगॉन्ग ओव्हलच्या मैदानावर पार पडला. ही खेळपट्टी फलंदाजीसाठी अनुकूल मानली जाते. या खेळपट्टीवर फलंदाजी करताना मुशीरने न्यूझीलंडच्या गोलंदाजांचा चांगलाच समाचार घेतला.

त्याने या सामन्यात १२६ चेंडूत १३ चौकार आणि ३ षटकारांच्या मदतीने १३१ धावा चोपल्या. यासह त्याने या स्पर्धेत ३०० धावांचा पल्ला गाठला आहे. यापूर्वी आयर्लंडविरुद्ध झालेल्या सामन्यातही त्याने शतकी खेळी केली होती.

मुशीरचा धोनी स्टाईल हेलिकॉप्टर शॉट..

भारतीय संघाची फलंदाजी सुरू असताना मुशीरने ४६ व्या षटकात हेलिकॉप्टर शॉट मारला जो पाहून तुम्हालाही धोनीची आठवण आल्याशिवाय राहणार नाही. गोलंदाजाने यॉर्कर चेंडू टाकला. या चेंडूवर मुशीरने वेगाने बॅट फिरवत चेंडू सीमारेषेच्या बाहेर पोहचवला. त्याच्या या शॉटचा व्हिडिओ सध्या सोशल मीडियावर तुफान व्हायरल होत आहे. (Latest cricket news in marathi)

मुशीरच्या नावे मोठ्या रेकॉर्डची नोंद..

मुशीरने या स्पर्धेत धावांचा पाऊस पाडला आहे. यापूर्वी आयर्लंडविरुद्ध झालेल्या सामन्यात त्याने तुफानी शतक झळकावलं होतं. तर न्यूझीलंडविरुद्ध झळकावलेलं शतक हे त्याचं या स्पर्धेतील सलग दुसरं शतक ठरलं आहे. यासह तो या स्पर्धेत २ शतकं झळकावणारा दुसराच भारतीय फलंदाज ठरला आहे. यापूर्वी शिखर धवनने २००४ अंडर १९ वर्ल्डकप स्पर्धेत ३ शतकं झळकावली होती.