टीम इंडियाचा स्टार फलंदाज केएल राहुलने २२ एप्रिल रोजी पुन्हा एकदा त्याच्या तुफान फलंदाजीचा नजराणा सादर केला. मंगळवारी एकाना स्टेडियममध्ये दिल्ली कॅपिटल्स विरूद्ध लखनऊ सुपर जाएंट्स यांच्यात सामना खेळवला गेला. या सामन्यात लखनऊचा धुव्वा उडवत दिल्लीने ८ विकेट्सने सामना जिंकला.

या सामन्यात दिल्लीचा फलंदाज केएल राहुलने मॅच विनिंग अर्धशतक झळकालं. राहुलने ५७ रन्सची खेळी करत पुन्हा एकदा दिल्लीला विजय मिळवून दिला. दरम्यान या सामन्यानंतर केएल राहुल आणि संजीव गोएंकांचा एक व्हिडीओ सोशल मीडियावर व्हायरल होतोय. या व्हिडीओमध्ये केएल राहुलने गोएंकाना इग्नोर केल्याचं दिसतंय.

गेल्या सिझनमध्ये झाला होता वाद

गेल्या सिझनमध्ये संजीव गोएंकाची टीम लखनऊ सुपर जाएंट्सचा कर्णधार केएल राहुल होता. या सिझनमध्ये एका सामन्यात झालेल्या पराभवानंतर गोएंकांनी मैदानावर येत केएल राहुलला चांगलंच झापलं होतं. याचा व्हिडीओ देखील त्यावेळी सोशल मीडियावर व्हायरल झाला होता.

केएल राहुलचं जशास तसं उत्तर?

गेल्या वर्षी व्हायरल झालेल्या त्या व्हिडीओमध्ये गोएंका संतापलेले असताना केएल राहुल मात्र शांत उभा राहून ऐकून घेत होता. यानंतर आयपीएल २०२५ पूर्वी केएल राहुलने लखनऊला अलविदा करत तो दिल्लीच्या टीममध्ये सामील झाला. अशातच २२ एप्रिल रोजी दिल्लीच्या टीमने लखनऊचा पराभव केला.

राहुल आणि अभिषेकने अर्धशतकी खेळी करत १६० रन्सचं टार्गेट सहजरित्या पूर्ण केलं. दरम्यान जिंकल्यानंतर गोएंका मैदानावर उतरून केएल राहुलला शुभेच्छा देण्यासाठी आले. त्यावेळी त्यांनी राहुलशी हात मिळवला आणि ते थांबून त्याच्याशी बोलण्याचा प्रयत्न केला. मात्र यावेळी राहुल हात मिळवून पुढे निघाला. त्यांनी गोएंकांना इग्नोर केलं आणि पुढे चालू लागला. या घटनेचा व्हिडीओ सोशल मीडियावर व्हायरल होतोय.

केएल राहुल सध्या उत्तम फॉर्ममध्ये

आयपीएलच्या या सिझनमध्ये केएल राहुल उत्तम फलंदाजी करताना दिसतोय. एकाना स्टेडियममध्ये लखनऊच्या टीमने चांगली सुरुवात केली. मात्र पुढच्या क्रमातील फलंदाजांना चांगली कामगिरी करता आली नाही. अखेरीस लखनऊच्या पूर्ण टीमला केवळ १५९ रन्स करता आले.